மலபார் பரோட்டா

                            பரோட்டா என நினைத்தாலே அனைவருக்கும் அவரவர்கள் சாப்பிட்ட பரோட்டாக்களின்  சுவை கண் முன்னே தோன்றி மறைந்து  நாவூறச் செய்யும் ஒரு சுவையான  உணவுப்  பண்டமாகும்.    

           நாம் விரும்பி சாப்பிடும் பரோட்டாக்களில்தான் எத்தனை வகை. கொத்து பரோட்டா, பொரிச்ச பரோட்டா, முட்டை பரோட்டா, வீச்சு பரோட்டா, சிலோன் பரோட்டா,வாழை இலை பரோட்டா, மலபார் பரோட்டா என வித விதமான வகைகள். இன்று நம் பதிவில் சாப்பிட விரும்புவது மலபார் பரோட்டா .

                                           மலபார் பரோட்டா என்றவுடனே நம் நினைவுக்கு வருவது எங்கும் இயற்கை அன்னையின்  எழில் கொட்டிக் கிடக்கும் கேரள மண்தான். நமது ஊரில் இருக்கும் பரோட்டாக்களின் சுவை போலவே கேரள மண்ணின் சிறப்பான பரோட்டா உணவுதான் மலபார் பரோட்டா. பரோட்டாக்கள் லேயர் லேயராக பார்க்கும் போதே சுவைக்கத்  தூண்டும் வண்ணம்  மிருதுவாக இருக்கிறது.

                        மைதாமாவு, முட்டை, பால், தயிர், தூள் உப்பு, சிறிதளவு சர்க்கரை, எண்ணெய், தண்ணீர் என அனைத்தும் சேர்த்து பிசைந்து இரண்டு மணி நேரம் ஊற வைக்கவும். பிறகு அதனை உருண்டைகளாக உருட்டி எவ்வளவுக்கு வீசி மடித்து வைக்கிறோமோ அந்த அளவுக்கு பரோட்டா மிருதுத் தன்மையுடனும் , சுவையாகவும் இருக்கும்.

                                   இந்த முறை    கேரளா  சென்றிருந்த போது மலபார் பரோட்டா பற்றி கேள்விப்பட்டோம். வழக்கமான பரோட்டாக்களை விட அதில் என்ன தனி சுவை என தெரிந்து கொள்ள ஆசைப்பட்டு ஒரு உணவகத்தில் மலபார் பரோட்டா ஆர்டர் செய்தோம். பரோட்டா ஒரு வாய் எடுத்து வாயில் வைக்க ஆஹா என்ன சுவை. பரோட்டா  மிருதுவாகவும் மிகவும் சுவையாகவும் இருந்தது. சால்னா கலக்காத பரோட்டா ஒரு வித சுவையாகவும், சால்னா ஊற்றி அதன் வாசத்துடன் பரோட்டாவை சேர்த்து சாப்பிட அது வேறு வகை சுவையுடன் நன்றாக இருந்தது.

                                     பரோட்டாவுடன் பொரித்த  சிக்கன் கறியும்  சேர்த்து சாப்பிட தனி சுவையாகவும், மணமாகவும் இருந்தது. நன்றாக மசாலாவில் கலந்து ஊறிய சிக்கனை எண்ணெய்யில் பொரித்து எடுத்து சால்னா பரோட்டாவுடன் சேர்த்து சாப்பிட பரோட்டா வினாடியில் தட்டிலிருந்து மறைந்தது.

                                    பரோட்டாவின் சுவை சால்னாவுடன்  சேர்த்து சாப்பிடும் போதுதான் அதிகளவு தெரிகிறது. சில கடைகளில் பரோட்டா மிருதுவாக இருக்கும் ஆனால் சால்னாவில் சுவை இருக்காது. வேறு சில கடைகளில் பரோட்டா சற்று காய்ந்து போன மாதிரி இருந்தாலும் சால்னா சுவையாக இருந்தால்  பரோட்டாவை அதில் ஊற வைத்து சாப்பிட சுவை தூக்கி அடிக்கும். 

                        இந்த முறை மலபார் பரோட்டா சாப்பிட்ட அனுபவம் பயணத்தோடு சேர்ந்து இனிமையானதாக அமைந்தது.  

பரோட்டா பார்சல் தொடரும்...

கொத்து பரோட்டா ( KM பிரியாணி, திண்டுக்கல்)

சுவையான கொத்து பரோட்டா

                       

                                பரோட்டா இந்த உணவு பிடிக்காதவர்கள் யாரும் இருக்க முடியாது. சாதா பரோட்டவே ருசியான உணவாக  இருக்கும் போது அந்த பரோட்டவை சிறு சிறு துண்டுகளாய்  உதிர்த்து விட்டு  அதனுடன் முட்டை, வெங்காயம், சால்னா என சேர்த்து கொத்தும் போது அதன் ருசியை சொல்லவும் வேண்டுமா? வீட்டில் நாங்கள்   பரோட்டாவுக்கு பதிலாக பூரியை உதிர்த்து விட்டு   இப்படி கிளறுவோம். அது ஒரு தனி சுவையாக நன்றாக இருக்கும். அன்று வெளியே சென்று விட்டு வரும் போது கடையில் கொத்து பரோட்டா வாங்குவோம் எனத் தோன்ற பக்கத்தில் இருந்த  KM ஸ்டாலில் கொத்து பரோட்டாவும், சாதா பரோட்டாவும் பார்சல் செய்தோம்.

                                                   கொத்து பரோட்டா

                                       கொத்து பரோட்டாவையும் , மற்றதையும்   பார்சல் வாங்கிக் கொண்டு கிளம்பினோம் . வீட்டுக்கு சென்றானதும் பார்சலை பிரிக்க கொத்து பரோட்டா பச்சை நிற  இலைக்கு நடுவே  அழகாக காட்சியளித்தது. இலையின் வாசனையும், கொத்து பரோட்டாவின் வாசனையும் சேர்ந்து எங்களுக்கு பசியைத்  தூண்டியது. அனைவரும் ஆளுக்கு கொஞ்சமாக எடுத்து ருசி பார்த்தோம். வெள்ளை குருமாவோடு சேர்த்து கொத்து  பரோட்டாவை பிசைந்து சாப்பிட எல்லாரும்  சுவை அருமை, இன்னொரு பார்சல் வாங்கியிருக்கலாமே  என்றனர் .

                                                             

                                                        சாதா பரோட்டா

                                        சாதா பரோட்டா வட்ட வட்டமாக பொன்னிறத்துடன் பார்க்கவே பசியை தூண்டும் ருசியுடன் இலையில் வீற்றிருந்தது. நமக்கு தேவைப்பட்டால் பரோட்டாவின் மீது எண்ணையை லேசாக தடவி தோசை சட்டியில் போட்டு 2 முறை திருப்பி விட்டால் பரோட்டா இன்னும் கொஞ்சம் க்ரிஸ்பியாக இருக்கும். எங்கள் வீட்டில் சில  சமயம் இப்படி செய்வதுண்டு .

                                      சால்னாவுடன் மணக்கும் பரோட்டா

                         பரோட்டாவை சிறு துண்டுகளாக்கி மணக்கும் வெள்ளை குருமாவோடு பரிமாறிய போது எடுத்த படம் . 

                                           பரோட்டா 2 வகை சால்னாவுடன் 

                             பரோட்டாவை இரண்டு வகை சால்னவுடன் கலந்து பரிமாறியது. இரண்டு சால்னாவும் சேர்த்து பிசைந்து சாப்பிட அது ஒரு புதுவித  சுவையாக இருந்தது.

                                                                               ஆம்லட்

                                வெங்காயம் , பச்சைமிளகாயை வதக்கி அதனோடு முட்டையை உடைத்து விட்டு நன்றாக  கலக்கி எண்ணையுடன் சேர்த்து பெரிய தோசைக்கலில் கேட்பவர்களுக்கு வரிசையாக வேக விட்டு எடுத்து தருகின்றனர். இந்த ஆம்லட் சப்பாத்தி மற்றும் பரோட்டாவுக்கு நல்ல காமினேசனாக இருக்கும் என்பர் . 

                                                               KM ஹோட்டல்

                                          KM பிரியாணி என்பது இந்த ஹோட்டலின் பெயராக இருந்தாலும் இங்கு கிடைக்கும் பரோட்டா சால்னா மற்றும் கொத்து பரோட்டா நல்ல சுவையாக இருக்கும். இந்த ஹோட்டல் திண்டுக்கல் கடை வீதியில் பேசன் சில்க்ஸ் கடைக்கு பக்கத்தில் உள்ளது. இதன் அருகே இரட்டை விநாயகர் கோவில் உள்ளதால் பெரும்பாலோனோர் அடையாளத்திற்கு இதை இரட்டை விநாயகர் கடை என்பர். இந்த ரோட்டிலேயே இன்னும் சிறிது தூரம் தள்ளி சென்றால் கார்னரில் இதன் கிளையாக இன்னொரு KM பரோட்டா கடை உள்ளது. நிறைய பேர் இங்கு சாப்பிட்டும், பார்சல் வாங்கியும் செல்கின்றனர்.

                                                                                                  பரோட்டா பார்சல் .....

                                                                                                          தொடரும்....